Ramiz Mehdiyevlə Elton Məmmədovun arası dəydi

AMEA-nın prezidenti Ramiz Mehdiyev iclasda qurumun İşlər idarəsinin müdiri Elton Məmmədovu sərt tənqid edərək işdən azad edib.

"Qanunyolu.info.az", "Unikal.org"-un əldə etdiyi məlumata istinadən, E.Məmmədov isə uzunmüddətli məzuniyyətə çıxaraq, iyun ayının 14-dən işdən çıxması ilə bağlı ərizə yazaraq akademiyanı tərk edib.

"Qanunyolu.info.az" xəbər verir ki, sabiq deputat Ramiz Mehdiyevin AMEA-da həyata keçirdiyi ilk təyinatlardan olub. Belə ki, Ramiz Mehdiyev 2019-cu ilin oktyabrın 23-də AMEA prezidenti seçilib. Həmin ilin noyabrında isə Ziya Məmmədovun qardaşı Elton Məmmədova yüksək vəzifə verərək onu AMEA-nın "Yüksək Texnologiyalar Parkı" Məhdud Məsuliyyətli Cəmiyyətinin direktoru təyin edib. Təyinatından 4 ay sonra yəni 2020-ci ilin martın 6-da eks-deputat sözügedən vəzifədən azad edilib. Onun yerinə keçmiş nazir Əli Abbasov gətirilib.

Daha sonra isə E. Məmmədova AMEA-da işlər müdiri vəzifəsi həvalə edilib. Qısa vaxt aralıqlarıyla vəzifəyə gətirilib-çıxarılan Elton Məmmədovla AMEA prezidenti arasında fikir ayrılıqları və münasibətlərinin yaxşı olmadığı görünür. Elə bu anlaşılmazlıqlara görə Ramiz Mehdiyev onu qapalı iclasda sərt tənqid edib, E.Məmmədov da ərizə yazaraq AMEA-nı tərk edib.