“Lukaşenkonun gizli inauqurasiyası onun nüfuzunu daha da zəiflədir”

Belarusda Aleksandr Lukaşenkonun prezident səlahiyyətlərinin icrasına başlaması münasibətilə gizli inauqurasiya mərasimi keçirməsi onu daha da nüfuzdan salır. "Qanunyolu.info.az", “Qafqazinfo”-nun məlumatına istinadən, bu barədə Böyük Britaniyanın Xarici İşlər naziri Dominik Raab bildirib.

“Lukaşenkonun bu gün (sentyabrın 23-də -red.) Minskdə keçirilən gizli inauqurasiyası onun nüfuzunu daha da zəiflədir. Onun saxtalaşdırılmış seçkiləri Belarus xalqını aldatmaq idi”, - Raab tvitterdə yazıb.

Daha əvvəl ABŞ Dövlət Departamenti gizli inauqurasiya mərasimi keçirən Aleksandr Lukaşenkonu Belarus prezidenti kimi tanımadığını bəyan etmişdi.

Qeyd edək ki, Belarusda 9 avqustda baş tutan prezident seçkilərinin nəticələrinə etiraz olaraq, bir ay yarımdır ki, etiraz aksiyaları davam edir. 1994-cü ildən bu vəzifəni tutan hazırkı dövlət başçısı Aleksandr Lukaşenko qalib elan edilib. Müxalifət hakimiyyətin elan etdiyi seçki nəticələrini tanımır, onları saxta hesab edir.