Nazirliyin keçmiş idarə rəisi həbs edilib

Ekologiya və Təbii Sərvətlər Nazirliyinin Meşələrin İnkişafı Xidmətinin Qəbələ Regional Meşə Təsərrüfatı Mərkəzinin eks-direktoru Alim Əlizadə həbs edilib.

“Qanunyolutv.az”-ın əldə etdiyi məlumata görə, A.Əlizadə barəsində Cinayət Məcəlləsinin 308.2 (Vəzifə səlahiyyətlərindən sui-istifadə) 311.3.2 və 311.3.3-cü (Rüşvət alma, külli miqdarda və təkrar törədilməklə) maddələri ilə açılmış işin istintaqı başa çatıb. İşə Şəki Ağır Cinayətlər Məhkəməsində hakim Nahid Mirzəyevin sədrliyi ilə baxılıb.

Məhkəmədə bildirilib ki, ETSN-in Meşələrin İnkişafı Xidmətinin Meşə Təsərrüfatı Mərkəzinin keçmiş direktoru İlqar Qəribov 2020-ci ildə vəzifədən azad edilib. İşində yol verdiyi nöqsanlara görə barəsində cinayət işi açılan və həbs edilən İ.Qəribovun yerinə həmin vaxt 1983-cü il təvəllüdlü Alim Əlizadə təyin edilib. Lakin sonradan A.Əlizadənin də oxşar əməllər törətməsi barədə hüquq-mühafizə orqanlarına müraciətlər daxil olub. Bir neçə ay əvvəl Alim Əlizadə işdən çıxarılıb və barəsində cinayət işi açılıb.

Bildirilib ki, Alim Əlizadə İsmayılı, Oğuz və Qəbələ rayonlarında meşə təsərüfatına məxsus ərazilərdə obyektlərin tikilməsi, söhbətgahların salınması məqsədilə müxtəlif şəxslərdən rüşvət qismində külli miqdarda pul alıb.

Məhkəmədə Alim Əlizadə özünü təqsirli bilməyib və ona müraciət edən iş adamlarına yalnız məsləhət verdiyini deyib.

Şəki Ağır Cinayətlər Məhkəməsinin hökmü ilə Alim Əlizadəyə 8 il 6 ay müddətinə həbs cəzası verilib.

Fotoda: Həbsdə olan digər idarə rəisi İlqar Qəribov