Moskvada 200-dən çox şəxs saxlanıldı - Fotolar + Yenilənib

Hüquq-mühafizə orqanları Moskvada Preobrazhenskaya Meydanı metrostansiyasının yaxınlığında və bu gün müxalif bloqqer Aleksey Navalnının gətirildiyi Moskva Şəhər Məhkəməsinə gedən yolda bir neçə şəxsi nəzarətə alıb.

“Qanunyolu.info.az”, “İnterfaks”-a istinadən xəbər verir ki, ən az dörd nəfərin saxlanıldığı bildirilib.


Gücləndirilmiş polis və Milli Qvardiya dəstələri məhkəmə binasında növbətçi vəziyyətindədir. Məhkəmə binasına yaxınlaşmaq demək olar ki, mümkün deyil - yalnız akkreditə olunmuş jurnalistlərə, məhkəmə prosesinin iştirakçılarına və səfirlik maşınlarına giriş icazəsi verilir. Məhkəmə binasına ən yaxın olan həyətlərə girişlər də bağlanıb, polis yalnız bina sakinlərini içəri buraxır.

Qeyd edək ki, rus müxalif bloqqer Aleksey Navalnı bu gün şərti cəzasının həqiqi cəza ilə əvəz olunması məsələsi ilə əlaqədar Simonovskiy Rayon Məhkəməsinin iclasının keçiriləcəyi Moskva Şəhər Məhkəməsinə gətirilib.


Məhkəmə binası ətrafında və yaxın ərazilərdə 200-dən çox şəxs saxlanılıb.

“Əldə etdiyimiz məlumata görə, indiyə qədər 200-dən çox şəxs nəzarətə alınıb”,- deyə Moskva İctimai Nəzarət Komissiyasının icraçı katibi Aleksey Melnikov “İnterfaks”a bildirib.

Saxlanılanların bir qismi polis şöbələrinə aparılıb.