Vlada Axundovanın ölümünə səbəb olan sürücüyə - Hökm oxundu

Ötən il Səbail rayonu Bayıl qəsəbəsində tanınmış müğənni Vlada Axundovanın ölümü ilə nəticələnən yol-nəqliyyat hadisəsi ilə bağlı açılmış cinayət işi üzrə məhkəmə prosesi keçirilib.

“Qanunyolutv.az” xəbər verir ki, Vlada Axundovanın olduğu taksiyə çırpılan “Hyundai” markalı avtomobilin sürücüsü Salyan rayon sakini 2002-ci il təvəllüdlü Seyfulla Mehdizadəyə hökm oxunub.

Səbail Rayon Məhkəməsi onu Cinayət Məcəlləsinin 263.2-ci maddəsi ilə təqsirli bilib. Təqsirləndirilən şəxsə 3 il azadlıqdan məhrumetmə cəzası verilib. O, cəzasını məntəqə tipli müəssisədə çəkməlidir. Əlavə olaraq onun sürücülük hüququ 1 il 6 ay müddətə məhdudlaşdırılıb.

Qeyd edək ki, hadisə 2025-ci il oktyabrın 30-da Vlada Axundova “Toyota” markalı taksidən düşərkən baş verib. Bu zaman Seyfulla Mehdizadənin idarə etdiyi avtomobil arxadan həmin maşına çırpılıb. Zərbədən 1987-ci il təvəllüdlü sənətçi vəfat edib.

Məhkəmədə zərərçəkən şəxsin hüquqi varisi 24 yaşlı sürücünü bağışladığını bildirib.

Fotoda: Vlada Axundova