Valideynlər yeni direktora etiraz etdilər - Video

Ağsu rayonunun Pirhəsənli kəndinin bir qrup sakini kənd məktəbinə yeni direktor təyin olunmasına etiraz edirlər. Onlar yeni direktor Aqil Həsənovla bağlı bir neçə aksiya keçiriblər.

Bununla bağlı sosial şəbəkədə videogörüntülər yayılıb. Övladı bu məktəbdə təhsil alan valideynlərin sözlərinə görə, əvvəllər Ağsu Rayon Təhsil Şöbəsinin müdiri vəzifəsində çalışan Aqil Həsənov işinin öhdəsindən gələ bilmədiyinə görə işdən çıxarılıb. Onlar iddia edirlər ki, yeni direktor məktəbdə də vəzifəsinin öhdəsindən gələ bilməyəcək. Kənd sakinləri həmçinin bu səbəbdən öz uşaqlarını məktəbə göndərməkdən imtina ediblər.

"Qanunyolu.info.az" xəbər verir ki, məsələ ilə bağlı Pirhəsənli kənd tam orta məktəbinin direktoru Aqil Həsənov artıq problemin həll olunduğunu bildirib: “Problem artıq həll olunub, hazırda məktəbdə heç bir problem yoxdur. Biz bu barədə nazirliyə öz mövqeyimizi bildirmişik. Onlardan da soruşa bilərsiniz”.

Ağsu Rayon Təhsil Şöbəsinin müdiri Əlimirzə Məmmədov isə kənd sakinlərinin etirazını əsassız adlandırıb: “Sakinlərin bu narazılığı əsassızdır. Çünki yeni direktor təhsil nazirinin əmri ilə bu vəzifəyə təyin olunub. A. Həsənov bundan əvvəl Təhsil Şöbəsinin müdiri vəzifəsində çalışıb. Müəyyən problemlər olduğuna görə vəzifəsindən azad olunub. Amma Aqil Həsənov yaxşı direktor olub, direktor kimi nailiyyətləri var. Hazırda onunla birillik müqavilə bağlanıb. Sakinlər istəyirdilər ki, direktor kənd müəllimləri arasından seçilsin. Mən onlarla görüşdüm və izah etdim ki, direktor təyinatı nazirin əmri ilə olur. Onlar da başa düşdülər”.

Əlmirzə Məmmədov həmçinin artıq etiraz edən valideynlərin bu gündən öz övladlarını dərsə göndərdiklərini bildirib.