Gəncə Şəhər İcra Hakimiyyətinin təşkilatçılığı ilə Gəncə şəhər Heydər Əliyev Mərkəzində “Konstitusiya və Suverenlik İli” çərçivəsində Ümummilli Lider Heydər Əliyevin 102-ci ildönümünə həsr olunmuş “Heydər Əliyev – Müstəqil və qüdrətli Azərbaycanın banisi” mövzusunda dəyirmi masa keçirilib.“Qanunyolutv.az” xəbər verir ki, tədbirdə Gəncə Şəhər İcra Hakimiyyətinin başçısı Niyazi Bayramov, Gəncə Apellyasiya Məhkəməsinin sədri Toğrul Əli, Gəncə Şəhər Məhkəməsinin sədri Xaqani Tağıyev, YAP Gəncə şəhər təşkilatının sədri Bayram Aslanov, AMEA Gəncə Bölməsinin sədri, akademik Fuad Əliyev, Gəncə Dövlət Universitetinin rektoru Yusif Yusibov, Azərbaycan Texnologiya Universitetinin rektoru Yaşar Ömərov, Bitki Mühafizəsi və Texniki Bitkilər Elmi-Tədqiqat İnstitutunun direktoru, professor İbrahim Cəfərov, eləcə də hüquq-mühafizə orqanlarının, idarə, müəssisə və təşkilatların rəhbərləri iştirak ediblər.
Əvvəlcə rəsmilər Heydər Əliyev Mərkəzinin qarşısında ucaldılmış Ulu Öndərin abidəsini ziyarət edərək önünə gül dəstələri düzüb, onun xatirəsinə dərin ehtiramlarını ifadə ediblər. Daha sonra Mərkəzdə yerləşən Ulu Öndər Heydər Əliyevin Xatirə Muzeyinə ekskursiya təşkil olunub, iştirakçılar rəsm sərgisinə baxış keçiriblər.
Tədbir zamanı Müstəqil Azərbaycan Respublikasının memarı və qurucusu, görkəmli dövlət xadimi, dünya miqyaslı siyasətçi, xalqımızın Ümummilli Lideri Heydər Əliyevin və şəhidlərimizin əziz xatirəsi bir dəqiqəlik sükutla yad edilib. Daha sonra Azərbaycan Respublikasının Dövlət Himni səsləndirilib.
Aparıcı tərəfindən Ulu Öndər Heydər Əliyevin şərəfli həyat yolu, müdrik liderlik fəaliyyəti və xalqına göstərdiyi misilsiz xidmətlər barədə ətraflı məlumat təqdim olunub.
Niyazi Bayramov çıxışında vurğulayıb ki, Ulu Öndər Heydər Əliyevin müdrik və qətiyyətli siyasi fəaliyyəti Azərbaycan xalqının taleyində dönüş nöqtəsi olmaqla, ölkəmizin müstəqillik tarixində yeni və şanlı bir mərhələnin əsasını qoyub: “Onun rəhbərliyinin hər iki dövründə ölkəmiz sosial-iqtisadi inkişaf, elm, təhsil, mədəniyyət və digər sahələrdə mühüm nailiyyətlər əldə edib. Şəhər rəhbəri bildirib ki, məhz Ulu Öndərin uzaqgörən siyasəti nəticəsində Azərbaycanın sabitliyi təmin olunub, ölkəmiz bölgədə və beynəlxalq aləmdə söz sahibi olan bir dövlətə çevrilib. Onun ideyaları bu gün də yaşayır və inkişaf edir. Prezident İlham Əliyevin rəhbərliyi ilə bu ideyalar uğurla davam etdirilir, Azərbaycan güclənir, qüdrətlənir və regionda lider mövqeyini möhkəmləndirir”.
Daha sonra çıxış edən Bayram Aslanov, akademik Fuad Əliyev, professor İbrahim Cəfərov və Gəncə Tibb Kolleci PHŞ-nin direktoru, Əməkdar həkim Mehman Rzayev “Heydər Əliyev – Müstəqil və qüdrətli Azərbaycanın banisi” mövzusunda fikirlərini bölüşərək Ulu Öndərin Azərbaycan xalqı qarşısındakı misilsiz xidmətlərindən danışıblar.
Sonda Heydər Əliyev Mərkəzinə ekskursiya edən şagirdlərlə xatirə şəkli çəkdirilib.
