Məmməd Musayev yola salındı

Maliyyə naziri Sahil Babayevin sədrliyi ilə “Aqrarkredit” (QSC) Səhmdarının növbədənkənar ümumi yığıncağı keçirilib.

"Qanunyolutv.az" xəbər verir ki, Maliyyə Nazirliyindən verilən məlumata görə, yığıncaqda QSC-nin İdarə Heyətinin üzvlərinin səlahiyyət müddətlərinin başa çatması ilə əlaqədar olaraq yeni tərkibin formalaşdırılması məsələsi müzakirə olunub.

Sahil Babayev səlahiyyət müddətləri başa çatan İdarə heyətinin üzvlərinə, o cümlədən sədr Məmməd Musayevə öz təşəkkürünü bildirib.

Yığıncaqda QSC-nin İdarə Heyətinin yeni tərkibi təsdiq edilib. Yığıncağın qərarına əsasən İlham Kələşov, Rəcəb Hüseynov və Cahid Quluzadə İdarə Heyətinə yeni üzvlər seçiliblər. Eyni zamanda, İ.Kələşov İdarə Heyəti sədrinin birinci müavini və sədrin səlahiyyətlərinin müvəqqəti icraçısı, R.Hüseynov isə sədr müavini təyin olunub.

Məlumat üçün bildirək ki, “Aqrarkredit” QSC-nin Nizamnaməsinə əsasən, İdarə Heyətinin üzvləri Səhmdarın ümumi yığıncağı tərəfindən 4 ildən çox olmayan müddətə seçilirlər.

Qeyd edək ki, Məmməd Musayev eyni zamanda Azərbaycan Sahibkarlar Konfederasiyasının prezidentidir.