İlham Əliyevlə Nikol Paşinyan təkbətək görüşdü

Brüsseldə Azərbaycan Prezidenti İlham Əliyev və Ermənistanın Baş naziri Nikol Paşinyan arasında təkbətək görüş keçirilib.

“Qanunyolu.info.az” xəbər verir ki, bu barədə jurnalistlərə açıqlamasında Avropa İttifaqı Şurasının Prezidenti Şarl Mişel bildirib.

Sözügedən görüş Azərbaycan Prezidenti İlham Əliyev, Avropa İttifaqı Şurası Prezidenti Şarl Mişel və Ermənistanın Baş naziri Nikol Paşinyan arasındakı nahar əsnasında baş tutmuş üçtərəfli görüş çərçivəsində olub.

Jurnalistlər Şarl Mişellə danışıqlar zamanı doğrudan da Əliyev və Paşinyana təkbətək danışmaq imkanı vermək üçün qısa müddətlik onları tərk edib-etməməsi barədə sual verib. O isə sözügedən suala “Bəli, bu, doğrudur”, - deyə cavab verib.

İkitərəfli görüşün sonunda Şarl Mişel yenidən müzakirələrə qoşulub. Bu, 44 günlük Vətən müharibəsindən sonra iki ölkə rəhbərləri arasında ilk təkbətək görüşdür.