Mehdi Xəlilbəyli məhkəmə zalından azadlığa buraxıldı

Almaniyadan mühacirətdən qayıdandan sonra həbs edilən Müsavat fəalı Mehdi Xəlilbəylinin cinayət işi üzrə məhkəmə araşdırması başa çatıb.

“Qanunyolutv.az"-ın məlumatına görə, Səbail Rayon Məhkəməsində keçirilən sonuncu iclasda hökm oxunub.

Hökmə əsasən, Mehdi Xəlilbəyli verilmiş ittihamlarla təqsirli bilinib. Amma ona 2 il sınaq müddəti seçilməklə 4 il şərti cəza verilib.

O, məhkəmə zalından azadlığa buraxılıb.

Qeyd edək ki, Mehdi Xəlilbəyli bu ilin əvvəlində Avropadan Bakıya qayıdarkən hava limanında saxlanılıb. Onun barəsində Binəqədi Rayon Məhkəməsinin qərarı ilə həbs-qətimkan tədbiri seçilib. Onun Bakıya könüllü olaraq, istintaqa təslim olmaq üçün gəldiyi bildirilib.

Ona qarşı Cinayət Məcəlləsinin 220 (kütləvi iğtişaş), 221 (xuliqanlıq) və 315 (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham elan olunub.