Ağcabədidə qanunsuz ov edənlər saxlanıldı

Laçın rayon polis şöbəsinin əməkdaşları qanunsuz ov edən şəxsləri aşkar edib.

Qanunyolu.info.az "Qafqazinfo"-ya istinadən verdiyi məlumata görə, Laçın rayon polis şöbəsinə Ağcabədi rayonu Taxta körpü qəsəbəsi "Nurəddin qış obası" istiqamətində qanunsuz ov edilməsi barədə məlumat daxil olub.

Polis əməkdaşları tərəfindən keçirilmiş əməliyyat-axtarış tədbirləri nəticəsində "VAZ-21099" markalı avtomobil saxlanılıb. Nəqliyyat vasitəsinin sürücüsü, 1968-ci il təvəllüdlü Zərdab rayon sakini Tahir Süleymanov və avtomobildə sərnişin qismində olan, 1986-ci il təvəllüdlü Ağcabədi rayon sakini Əli Mirzəyev olması müəyyən edilib.

Hər iki şəxsin iştirakı ilə avtomobillə baxış keçirilən zaman nəqliyyat vasitəsinin yük yerində 7 ədəd ovlanması qadağan edilmiş "Turac" növünə aid çöl quşları, avtomobilin salonunda 1 ədəd ov tüfəngi, 1 ədəd 16 çaplı qoşa lülə və həmin silahlara aid çoxlu sayda müxtəlif növ patronlar aşkar edilərək götürülüb.

Faktla bağlı Laçın rayon polis şöbəsində cinayət işi başlanıb, araşdırma aparılır