Hacı Rauf Sərdarov
Abşeron-Sumqayıt-Xızı bölgə qazisiİslam dini Azərbaycan xalqının tarixində və milli-mənəvi dünyagörüşündə xüsusi yer tutur. Əsrlər boyu xalqımız İslamın mərhəmət, xeyirxahlıq, sülh, insan sevgisi və yardımlaşma kimi ali dəyərlərini öz həyat tərzində yaşadıb və nəsildən-nəslə ötürüb. Məscidlər, ziyarətgahlar və müqəddəs dini məkanlar isə bu zəngin mənəvi irsin mühüm hissəsidir.Azərbaycanın milli-mənəvi dəyərlərinin qorunması və dini irsin gələcək nəsillərə çatdırılması istiqamətində həyata keçirilən layihələrdə Mehriban Əliyevanın fəaliyyəti xüsusi diqqət çəkir. Heydər Əliyev Fondunun rəhbəri kimi Mehriban Əliyeva Azərbaycanın tarixi, mədəni və dini abidələrinin qorunmasına yönələn çoxsaylı təşəbbüslərə dəstək verib.
Bu istiqamətdə görülən işlər arasında məscidlərin və ziyarətgahların bərpası xüsusi yer tutur. Qədim dini abidələrin yenidən həyata qaytarılması yalnız memarlıq nümunələrinin qorunması deyil, həm də xalqın dini və milli yaddaşının yaşadılması baxımından mühüm əhəmiyyət daşıyır.
Mehriban Əliyevanın müqəddəs məkanlara şəxsi ziyarətləri də onun milli-mənəvi dəyərlərə münasibətinin nümunələrindən biridir. 2019-cu il avqustun 26-da Mehriban Əliyeva və qızı Leyla Əliyeva Bakıda yerləşən Bibiheybət ziyarətgah kompleksini ziyarət ediblər. Ziyarət zamanı Mehriban Əliyevaya məsciddə müqəddəs Qurani-Kərim hədiyyə olunub.
Bibiheybət ziyarətgahı Azərbaycan xalqının ən qədim və tanınmış müqəddəs məkanlarından biridir. 2024-cü il avqustun 26-da, yəni Mehriban Əliyevanın doğum günündə də o, qızı Leyla Əliyeva ilə birlikdə Bibiheybət ziyarətgah kompleksini ziyarət edib. Bu fakt onun müqəddəs ocaqlara və dini-mənəvi irsimizə göstərdiyi diqqətin daha bir nümunəsidir.
Mehriban Əliyevanın ziyarət etdiyi müqəddəs məkanlardan biri də Gəncədə yerləşən İmamzadə dini kompleksidir. 2019-cu ildə Mehriban Əliyeva və Leyla Əliyeva İmamzadə kompleksini ziyarət edib, burada zəvvarlarla görüşüblər. Ziyarət zamanı onlara Qurani-Kərim təqdim olunub. İmamzadə Azərbaycanın qədim dini-mədəni irsinin qiymətli nümunələrindən biri kimi xüsusi əhəmiyyət daşıyır.
Dini irsin qorunması istiqamətində Mehriban Əliyevanın təşəbbüsü ilə həyata keçirilən layihələr arasında Şamaxıdakı Pirsaat Baba ziyarətgah-məscid kompleksi də xüsusi yer tutur. 2019-cu ildə baş vermiş zəlzələdən sonra ziyarətgahda bərpa və yenidənqurma işlərinə başlanılıb. 2021-ci ildə Prezident İlham Əliyev və birinci xanım Mehriban Əliyeva kompleksin bərpa və yenidənqurmadan sonra açılışında iştirak ediblər.
Mehriban Əliyevanın dini abidələrə göstərdiyi diqqət yalnız ziyarətlərlə məhdudlaşmır. Onun rəhbərlik etdiyi Heydər Əliyev Fondunun “Azərbaycan – tolerantlıq məkanı” layihəsi çərçivəsində müxtəlif dini abidələrin qorunması və bərpası istiqamətində işlər görülüb. Bu fəaliyyət Azərbaycanın zəngin dini-mədəni irsinin qorunmasına və ölkəmizin tolerantlıq ənənələrinin dünyaya tanıdılmasına xidmət edir.
Şuşanın tarixi məscidlərinin bərpası da bu istiqamətdə xüsusi əhəmiyyət daşıyır. 2022-ci ildə Mehriban Əliyeva Prezident İlham Əliyevlə birlikdə Şuşada Yuxarı Gövhər Ağa məscidini ziyarət edib və burada Heydər Əliyev Fondu tərəfindən aparılan bərpa işləri ilə tanış olub. Tarixi dini abidələrin ilkin memarlıq xüsusiyyətlərinin qorunması bərpa prosesinin əsas istiqamətlərindən biri olub.
2025-ci ildə isə Mehriban Əliyeva Gəncədə Şah Abbas və Hüseyniyyə məscidlərini ziyarət edib. Şah Abbas məscidində tarixi-dini abidənin vəziyyəti ilə bağlı məlumat alıb və onun qorunması ilə bağlı tapşırıqlar verib. Hüseyniyyə məscidində də bərpa və təmirə ehtiyac olduğu qeyd olunub və lazımi işlərin görülməsi ilə bağlı göstərişlər verilib.
Bütün bunlar göstərir ki, Mehriban Əliyevanın fəaliyyətində dini və milli-mənəvi irsin qorunması mühüm istiqamətlərdən biridir. Məscidlərin və ziyarətgahların bərpası, müqəddəs məkanların qorunması və onların gələcək nəsillərə çatdırılması tariximizə və mənəvi dəyərlərimizə hörmətin ifadəsidir.
İslamın əsas dəyərləri olan mərhəmət, xeyirxahlıq, sülh, yardımlaşma və insanlara hörmət Azərbaycan xalqının mənəvi həyatında xüsusi yer tutur. Mehriban Əliyevanın sosial və humanitar fəaliyyətində də bu dəyərlərin izlərini görmək mümkündür. İnsanlara yardım göstərmək, uşaqlara və ehtiyacı olanlara qayğı ilə yanaşmaq, dini və mədəni irsin qorunmasına dəstək olmaq cəmiyyətin mənəvi inkişafına xidmət edən mühüm təşəbbüslərdir.
26 avqust – Mehriban Əliyevanın doğum günü də onun fəaliyyəti ilə yanaşı, milli-mənəvi dəyərlərimizə göstərilən diqqətdən danışmaq üçün əlamətdar tarixdir. Xüsusilə onun doğum günündə Bibiheybət ziyarətgahını ziyarət etməsi bu tarixi daha da mənalı edir.
Hörmətli Mehriban xanım, Sizi doğum gününüz münasibətilə ürəkdən təbrik edirik!
Sizə Uca Allahdan möhkəm cansağlığı, uzun ömür, ailə səadəti və bütün fəaliyyətinizdə uğurlar diləyirik. Qoy həyatınız hər zaman sevinc, xoşbəxtlik və gözəl xəbərlərlə zəngin olsun. Milli-mənəvi dəyərlərimizin, dini və mədəni irsimizin qorunması istiqamətində gördüyünüz işlər daim uğurlu nəticələrlə müşayiət olunsun.
Uca Allah Sizi və ailənizi qorusun, qəlbinizdə olan bütün gözəl arzuları gerçəkləşdirsin. Hər yeni yaşınız Sizə sağlamlıq, bərəkət, əmin-amanlıq və xoş günlər gətirsin.Doğum gününüz mübarək olsun, Mehriban xanım!Hörmətlə: Hacı Rauf Sərdarov
Abşeron-Sumqayıt-Xızı bölgə qazisi
